महल मड़इया से रंगदारी भूल गा।

 महल मड़इया से रंगदारी भूल गा। 

जउन दइस रहा वा उधारी भूल गा।। 

जब से चुनाव कै घोसना भै देस मा 

तब से मुँह झुरान है गारी  भूल गा।।  

BAGHELI KAVITA

                           बिटिया

ठुम्मुक ठुम्मुक जाथी  इस्कूलै  ड्रेस पहिर के बइया रे।

टाँगे  बस्ता  पोथी  पत्रा  बिटिया   बनी     पढ़इया रे। ।

खेलै   चन्दा,   लगड़ी,  गिप्पी,  गोटी,  पुत्ता  -पुत्ती  ।

छीन भर मा  मनुहाय जाय औ छिन भर माही कुट्टी। ।

बिट्टी  लल्ला   का   खिसबाबै   ''लोल  बटाइया  रे''। ।

ठउर   लगाबै   अउजै  परसै  करै चार  ठे त्वारा।

कहू  चढ़ी  बब्बा  के कइयां  कहु अम्मा के क्वारा। ।

जब  रिसाय  ता  पापा  दाकै  पकड़  झोठइया रे।

बिन बिटिया के अंगना अनमन घर बे सुर कै बंसी।

बिटिया दुइ  दुइ कुल  कै होतीं  मरजादा  बड़मंसी। ।

हमरे   टोरिअन   काही    खाये    जा   थै  दइय रे।

भले  नही  भइ  भये  मा  स्वाहर पै न माना अभारु।

लड़िका  से  ही ज्यादा  बिटिया  ममता भरी मयारू। ।

पढ़ी   लिखी  ता  बन  जई  टोरिया  खुदै  सहय्याँ रे।

कन्यन कै होइ रही ही हत्या बिगड़ि  रहा अनुपात।

यहै  पतन जो  रही 'हंस ' ता  कइसा  सजी बरात। ।

मुरही   कोख  से   टेर   लगाबै   बचा  ले मइया रे। ।

*************************************

✍️हेमराज हंस -- भेड़ा  मैहर