गदहा परेशान है गईया के प्रतिष्ठा मा।।

 सुमर कै नजर नित  रहा   थी  बिष्ठा  मा। 

हमीं  कउनव सक नहीं ओखे निष्ठा मा।।  

सेंतय का  झारन  मा जरा  बरा जात  है 

गदहा  परेशान है  गईया  के प्रतिष्ठा मा।।   

हेमराज हंस 

हम उनही दिल दइ दीन्ह्यान

 हम उनही दिल दइ दीन्ह्यान अब गुर्दा माँगा थें। 

बारिस  मा  सब सरि गै धान  ता  उर्दा माँगा थें।।

स्वस्थ बिभाग के सेबा से गदगद हें सब रोग बिथा 

अस्पताल   से   हरबी    छुटटी    मुर्दा माँगा थें।। 

हेमराज हंस 

बंगाल मा ! हा हा कार मचा है

मदारी  रोबा  थें    बांदर    रोबा थें। 

परिबार बिलखत है बिरादर रोबा थें।। 

बंगाल  मा !  हा  हा  कार मचा   है 

उइ  356   धरे  आँधर   सोबा थें। । 

हेमराज हंस  

गदहा परेसान है गइया के प्रतिष्ठा मा । ।

पसीना का ठगि  के वा  बइठ हबै  भिट्ठा मा। 

कइउ  ठे लजुरी   खिआनी   है   घिट्टा  मा । । 

सेंतय   का   जरा   बरा   जाथै   कमेसुर वा 

गदहा  परेसान  है  गइया  के  प्रतिष्ठा   मा । ।

 

हमरे   नुकसान  केर  डाँड़  बांकी  है। 

दुस्ट औ कृतघ्न कै दुइ फांड़ बांकी है।। 

जोकर उपाय  कइ  सब  हीच चुके हैं 

फलाने कहि रहें हें की भाँड़ बांकी है। ।

 हमी  रूप  से का  मतलब, हम ता आंखर मा रीझे हन। 

बानी के मंत्र लिखे कागद, हम मस मा खूब पसीझे हन।।

तुम प्रेम पिआसी पिंगला ता , हम उदासीन भरथरी हयन 

तुम्ही  शुभ  होय  तुम्हार  प्रेम, हम ता आंसू मा भींजे हन।। 

उइ   जेही  छूइ   देथें  वा  सोन  बन जाथै । 

खारा   पानी   जम   के  नोन    बन  जाथै ।।   

जादा   ना  सताबा   कउनव    गरीब   का

अपमान पी के एक दिन वा द्रोन बन जाथै ।। 

   

वा  एक   पुड़िया   कुरकुरा   मा  रगाय  गा।

पै  रोय  के सबका   नींद   से   जगाय   गा ।।

उनही   पुटिआमै   का  अउराथै    नीक  के 

घुनघुना  धराय के अउंटा पिअय सिखाय गा।।

गुरतुर का गुरतुर सखार का सखार कहा।

सांझ का सांझ सकार का सकार कहा।। 

 भले केत्तव  सजाबा  बनउक  बिझूका 

तोखार  न  बनी  वोही  धोखार   कहा। । 

या  ता अहरी आय  बखरी  कहूं  अउर  ही। 

मन तउलय के निता तखरी कहूं अउर ही। 

अब ता  कायलिव रचाये ओंठ   बागा थी 

प्रेम  काहू से  ता  पैपखरी  कहूं  अउर  ही।। 

पबरित परसाद भंडासराध कइ रहे हें।।

 जे मंदिर कै हमरे खंडित मरजाद कइ रहे हें। 

पबरित   परसाद    भंडासराध   कइ  रहे  हें।। 

उनहीं   पकड़  के  सीधे  सूली  मा  टांग  द्या 

हमरे  धरम के साथ जे अपराध   कइ  रहे  हें।। 

हेमराज हंस -भेड़ा मैहर 

महल मड़इया से रंगदारी भूल गा।

 महल मड़इया से रंगदारी भूल गा। 

जउन दइस रहा वा उधारी भूल गा।। 

जब से चुनाव कै घोसना भै देस मा 

तब से मुँह झुरान है गारी  भूल गा।।  

भइलो चलें देखामय भाटा।।

जब जर माही परिगा माठा। 

भइलो चलें देखामय भाटा।। 

एक कई खुब चहल पहल ही 

एक  कई  पसरा  सन्नाटा। ।  

गदहा का कहिहैं बाप। आसव चुनाव है।

मुलुर मुलुर बस देखा आप। आसव चुनाव है। 

देखा बनत  धजी का सांप।। आसव चुनाव है।

जे  किहे  नमस्ते   तक मा  कबहूं  नहीं  नेहरैं   

गदहा  का  कहिहैं   बाप।।   आसव  चुनाव है।

     हेमराज हंस===== 9575287490 

 

बम चकाचक होरी है।
रंगन मा दहबोरी है।।
नस्सा माही लस्सा ले थी
शहर गाँव हर खोरी है।।

हम दयन नये साल कै बधाई।

हम    दयन    नये    साल    कै   बधाई।
फलनिया कहिस तोहइ लाज नहीं आई।।
पाँव हें जोंधइया  मा  हाथे  परमानु बम
पै देस मा घ्रिना कै खासा  जबर  खाई। । 

गांधी जी अमर हैं गंगा के धारा अस

गांधी जी अमर हैं गंगा के धारा अस। 

देश के माटी मा जन जन के नारा अस।। 

गांधी पढाये जइहैं  सब दिन इसकूल मा 

भारत के भभिस्स  का गिनती औ पहाड़ा अस।। 

कोऊ अमीरी से त कोऊ गरीबी से दुखी है

कोऊ अमीरी से त कोऊ गरीबी से दुखी है। 

कोउ दुसमन से त कोउ करीबी से दुखी है।। 

या दुनिया मा सुख संच हेरे नही मिलय 

कोऊ मिया से ता कोउ बीबी से दुखी है।। 

उंई चाहाथें देस मा बाउर पइदा होंय

उंई चाहाथें देस मा बाउर पइदा होंय ।

औ उनखे घर मा जनाउर पइदा होंय ।।

एक   बूंद   पानी   न   बरखै  खेत मा

औ सीधे धान नही चाउर पइदा होंय।।

जातिवाद ह्याराथें रिमही बघेली

उंइ भस्मासुर मा जातिबाद ह्यारा थें।

राजनीत बोमैं का रेती मा खाद ह्याराथें।। 

बड़े गभुआर हें लोकतंत्र के लुच्चा 

कुलटन के बस्ती मा मरजाद ह्याराथें।। 

बेसाही सरकार का रुतबा Rimhi kavita

बेसाही सरकार का रुतबा नही रहे। 

जइसा कठपुतरी मा सुतबा नही रहै।। 

भले पूजा जिंद बरम बीस ठे खबीस 

पै हनुमान चलीसा बांचा ता भुतबा नही रहै।।