नास्तिक का पुरानिक बताऊ थें

 उइ बात बड़ी ठोस औ प्रमानिक बताऊ  थें। 

सामाजिक   जहर   का   टानिक   बताऊ थें।। 

जब उनही  देखाय  लाग  दाई  का  माइक  

ता उइ घोर   नास्तिक का  पुरानिक बताऊ थें। ।

हेमराज हंस 

बघेली मुक्तक

जानी थे सुमर आय पै बराह मानी थे। 

काहू कै नमूंजी करब गुनाह मानी थे।। 

गंगा कबेरी रेबा त मंत्र आंय नहात के 

हम बांस बिरबा तक का बाह मनीथे।। 

जो भउजाई बांख न होय

 

भाई  अस  दूसर  नही  जो  भउजाई  बांख  न  होय। 

बाउर अस है वा समाज जेखर आपन भाख न होय। । 

देस कै   जनता  नेम  प्रेम  भाई चारा  से  रहि  तो  लेय 

जो हमरे देस मा नफरत कै कारी  अँधिआरी पाख न होय। ।

मुक्तक

कोऊ सड़क कोउ पट्टी खाय गा।
कोऊ बोरा कोऊ कट्टी खाय गा।।
केत्ती घिनही भूंख बढी मोरे देस मा
कोऊ शौचालय सहित टट्टी खाय गा।।            🌻🌻🌻🌻🌻
वा बड़ा हुसिआर है नारा बेचा थै।
चोरन का सरदार है पै तारा बेंचा थै।।
हम ओखे शील सोहबत का प्रनाम करी थे वा भाई चारा काटैं बाला आरा बेंचा थै।।
🌻🌻🌻🌻🌻🌻🌻🌻🌻🌻🌻🌻🌻

धौं पुन आपन धइना देखा।।

 बघेली लोक साहित्य
--------------------------
पहिले भइलो अईना  देखा। 
धौं  पुन आपन धइना  देखा।। 
चश्मा केर पोंछि  के धूधुर  

जनता केर तरइना देखा। । 
हेमराज हंस 

दसइयां पिछ्ले चुनाव कै अद्धी गिनाउथै। । हेमराज हँस

                  बघेली मुक्तक 
-------------------------------
कोऊ आपन उपलब्धी गिनाउथै। 
कोउ आपन राज गददी गिनाउथै। । 
रटे है वा मुखागर की को को रात के आबा 
दसइयां पिछ्ले चुनाव कै अद्धी गिनाउथै। । 
हेमराज हँस 

BAGHELI-कब तक होई फुरा जमोखी। ।

केतू भाई अबै समोखी। 
कब तक होई फुरा जमोखी। । 
उइं मारय हमरे जमान का 
औ हम बुद्ध कै शिक्षा घोखी। । 
हेमराज हंस 

bagheli sahitya पै पीरा के ग्रन्थ तरी रहल नही होय। ।

गरीबन का कउनव दल नही होय। 
ओखे समिस्या का हल नही होय। । 
वा चाह ज्याखर जिन्दावाद ब्वालय 
पै पीरा के ग्रन्थ तरी रहल नही होय। । 
हेमराज हंस

BAGHEKI MUKTAK

टी. वी मा सभ्भदारन का नमूना देख ल्या। 
जुज्बी नही दोउ जूना देख ल्या।  । 
जउन अड़सठ साल से लगाबा जा रहा है 
उनखे बेलहरा का चूना देख ल्या। । 
हेमराज हंस 

बघेली नही ता अब वा ओरहन देई पं दीनदयाल से। ।

बघेली मुक्तक 

आबा भाई आँसू पोंछी पचके पचके गाल से।  

नही ता अब वा ओरहन देई पं दीनदयाल से। ।

टूट बडेरी अस जिंदगानी पाछू बइठ समाज के 

अजुअव ओढ़काबा है  टटबा जेखे सत्तर साल से। । 

हेमराज हंस   

BAGHELI वा लोकतंत्र का मंदिर औ विश्वास आय।

बघेली मुक्तक 

वा लोकतंत्र का मंदिर औ विश्वास आय। 

समाज का चित्र औ वहै इतिहास आय। । 

ओका दूध से भरा चाह दारू से 

आपन सदन त एक गिलास आय। । 

हेमराज हंस 

नाच रही ही दुलदुल घोड़ी

नाच रही ही दुलदुल घोड़ी 

नाच रही ही दुल दुल घोड़ी। 

मँहगाई गुंडई कै जोड़ी। । 

अच्छे दिन केत्ती दूरी हें 

पूछ रही पापा से मोड़ी। । 

हेमराज हंस  

ता दहला पकड़ का जुआ बताउथें। । हेमराज हंस --9575287490

मुक्तक 

दादू उइ कुहरा का धुँआ बताउथें। 

हुलकी का मयारू फुआ बताउथें। । 

जब हप्ता बसूली मा झंझी नही मिली 

ता दहला पकड़ का जुआ बताउथें। । 

हेमराज हंस --9575287490 

चपके रहा जोंक अस।

चपके रहा जोंक अस। 
कायर डरपोक अस। । 
कलिंग के शोक मा 
लगत्या है अशोक अस। । 
हेमराज हंस 

bagheli kavitaहमी जातिवाद का खाँचा न देखाबा।

मुक्तक 

हमी जातिवाद का खाँचा न देखाबा। 

जनता का नफरत का तमाचा न देखाबा। । 

य देस देखे बइठ है महाभारत के युयुत्स का 

अपने वफादारी का साँचा न देखबा। । 

हेमराज हंस ---9575287490 

तुलसी के बगिया मा नकटी कहां से आय गै।

मुक्तक 

तुलसी के बगिया मा नकटी कहां से आय गै। 

यतना पचामै कै शक्ती कहाँ से आय गै  । । 

गोकरन के सभा मा धुंधकारी कै धाक ही 

सत्ता के व्याकरण मा विभक्ति कहाँ से आय गै। । 

हेमराज हंस ----9575287490 

नकटी--एक तरह की झाड़ी 

तोहरे प्रेम के चिन्हारी अस।

तोहरे प्रेम के चिन्हारी अस। 

गउद औ पइनारी अस। । 
सरा थी आंसू मा 
जीवन के अमारी अस। । 
हेमराज हंस 

आंसू पी पी के अघान बइठ हे। ।

मुक्तक 

अनमन अनमन सयान बइठ हे। 

टन मन पीरा के बयान बइठ हे। । 

दोउ जून जुड़े जिव रोटी नही मिलै 

आंसू पी पी के अघान बइठ हे। । 

       हेमराज हंस 

आपन सहज बघेली आय।

बघेली 

आपन सहज बघेली आय। 

गाँव के क्वारा कै खेली आय। । 

विंध्य हबै ज्याखर अहिवात 

ऋषि अगस्त्य कै चेली आय। । 

हेमराज हंस --9575287490 

शनीचर का पता अढ़ैया से पूछत्या है।

मुक्तक 

शांति का पाठ लड़इया से पूछत्या है। 

शनीचर का पता अढ़ैया से पूछत्या है। । 

भोपाल से चला औ चौपाल मा हेराय गा 

विकास का पता मड़ैया से पूछत्या है।।

   हेमराज हंस