.jpg)
रविवार, 27 अप्रैल 2025
मइहर कवि दरबार के, रामनरेश
सम्माननीय कविवर श्री युत रामनरेश तिवारी जी को जन्म दिन की हार्दिक बधाई शुभकामनायें ,शतायु हों स्वस्थ्य रहें मंगलकामना
************२७ अप्रैल *******************
हम पंचे हींठय सिख्यन, पकड़े जिनखर लीख।
मइहर कवि दरबार के, रामनरेश प्रतीक।।
जब बानी औ शब्द मिल,. होंय तपिस्या लीन।
तब कवि राम नरेस अस, मनई बनै शालीन।।
शारद के बरदान अस , हैं नरेश श्री मान ।
जिनखे हाथे मा पहुँच, सम्मानित सम्मान।
पयसुन्नी अस सब्द का, जे पूजय दिनरात।
कबिता उनखे निता ही, जीबन कै जरजात।।
गीत ग़ज़ल कै आरती , दोहा कविता छंद।
आंखर आंखर आचमन, अंतस का आनंद।।
शब्द ब्रह्म का रुप है, वर्ण धरै जब भेष।
मइहर मा एक संत हैं, पंडित रामनरेश।।
तुलसी चउरा अस लगै , सब्दन का लालित्य।
मैहर मा चमकत रहैं, राम नरेश आदित्य।।
हेमराज हंस
शनिवार, 19 अप्रैल 2025
सिसकि रहा बंगाल
बोल बघेली बोल
****************
कखरी म लड़िका लये, मारत रही गोहार ।
टुकुर टुकुर देखत रही, दूरी से सरकार । ।
आँसू पीरा का लये, सिसकि रहा बंगाल।
ममताहीन ममता भयीं, बेलगाम चंडाल।।
धूं धूं कइके घर बरा, फूंक दिहिन सब गाँव ।
हमला काही कहि रहें, उइ दंगा सहनाव।।
हेमराज हंस
सोमवार, 14 अप्रैल 2025
हमरे देस मा बन चुके
बोल बघेली बोल
==========
हमरे देस मा बन चुके, खासे निर्मल गाँव।
लोटिआ लै बाहर चलीं, बहू बराये पांव।।
हेमराज हंस
रविवार, 13 अप्रैल 2025
बंगाल मा ! हा हा कार मचा है
मदारी रोबा थें बांदर रोबा थें।
परिबार बिलखत है बिरादर रोबा थें।।
बंगाल मा ! हा हा कार मचा है
उइ 356 धरे आँधर सोबा थें। ।
हेमराज हंस
मंगलवार, 8 अप्रैल 2025
जउन बोया वा काटा भाई।
बघेली कविता
----------------------------
जउन बोया वा काटा भाई।
अब काहे का घाटा भाई।।
जर्जर पोथी ही चरित्त कै
वमै चढ़ा ल्या गाता भाई।।
भया सुखे दुःख ठाढ़ न कबहूं
तब काहे का नाता भाई। ।
बड़े सत्तबादी बक्ता हा
पुन थूंका पुन चाटा भाई।।
आजु हबै मुँह जउकी का जउका
काल्ह कटी पुन लाटा भाई। ।
काहु का परथन कहूं समर्थन
आपन मतलब सांटा भाई।।
ऐसी कूलर अपना का सुभ
"हँस" के है फर्राटा भाई। ।
हेमराज हंस --मैहर
सदस्यता लें
संदेश (Atom)
-
बघेली लोक साहित्य जब से मूड़े मा कउआ बइठ है। अशगुन लये बऊआ बइठ है। । इंदिरा आवास कै क़िस्त मिली ही वा खीसा मा डारे पउआ बइठ ... -
पहिले जब खड़े होकर लघु शंका करना निषिद्ध माना जाता था। तब की बात है।एक बालक खड़े होकर लघुशंका कर रहा था। गांव के एक बुजुर्ग ने देखा तो उसे...
-
BAGHELI SAHITYA बघेली साहित्य : bagheli kavita नाती केर मोहगरी ''आजा'' जुगये आस कै... : बघेली कविता www.baghelisahitya.co...
-
बघेली लोक साहित्य जब से मूड़े मा कउआ बइठ है। अशगुन लये बऊआ बइठ है। । इंदिरा आवास कै क़िस्त मिली ही वा खीसा मा डारे पउआ बइठ ...
-
बघेली लोक साहित्य -------------------------- पहिले भइलो अईना देखा। धौं पुन आपन धइना देखा। । चश्मा केर पोंछि के धूधुर जनत...