गुरुवार, 21 नवंबर 2024
बुधवार, 20 नवंबर 2024
बुधवार, 30 अक्टूबर 2024
बुधवार, 23 अक्टूबर 2024
मैहर की इक शान थे विजयनारायण राय।
मैहर की इक शान थे विजयनारायण राय।
जीवन में जाना नहीं अपना और पराय।।
चाह सियासी मंच हो या साहित्य सोपान।
अब तक मैहर ढ़ूढ़ता उन जैसा प्रतिमान।।
है कृतज्ञ जिनका यहां पावन मैहर धाम।
काल खण्ड में अमर है उनका सादर नाम।।
जन नायक होते नही किसी जाति मे कैद।
वे बीमार समाज के हैं शुभ चिंतक वैद।।
हेमराज हंस भेड़ा
सोमवार, 21 अक्टूबर 2024
शुक्रवार, 18 अक्टूबर 2024
वा ता निकहा बीज रहा।
सोमवार, 14 अक्टूबर 2024
अब तो भइया जी अती होइगै।
शनिवार, 12 अक्टूबर 2024
गुरुवार, 10 अक्टूबर 2024
कवि सम्मलेन REWA 09.10.2024
शिव दुर्गा मंदिर समिति अनंतपुर रीवा मप्र के तत्वावधान में श्री दुर्गोत्सव के पावन प्रसंग में विशिष्ठ कवि सम्मलेन का सह भागी होने का अवसर प्राप्त हुआ। जिसमे देश के ख्याति लब्ध विद्वान मनीषीसुधि श्रोताओ के समक्ष वाणी पवित्र करने का सौभाग्य प्राप्त हुआ। सर्व श्री रामसिया शर्मा जी, श्री दुर्गा प्रसाद चतुर्वेदी जी ,श्री RP तिवारी जी , राष्ट्रिय कवि व्यंग्यकार रविशंकर चतुर्वेदी जी , श्री मति विमलेश जी सुश्री स्नेहा त्रिपाठी खनक जी डॉ रामसरोज शांतिदूत जी भृगुनाथ पांडेय भ्रमर जी हेमराज हंस भेड़ा। गरिमामयी संचालन आदरेय भ्रमर जी ने किया। संस्था के सम्माननीय सदस्यों का सादर आभार। कार्यक्रम में श्री सेवा राम त्रिपाठी जी जैसेशिक्षा विद विद्वान की उपस्थिति से सुवासित होता रहा। श्री दुर्गा प्रसाद चतुर्वेदी जी का काव्यपाठ न सुनपाने का मन में मलाल और अपराध बोध है।
प्रणाम -- रीवा धन्यवाद --- रीवा आभार रीवा
सोमवार, 7 अक्टूबर 2024
मंचीय मुक्तक
शुक्रवार, 4 अक्टूबर 2024
बघेली साहित्य bagheli sahitya हेमराज हंस : तहिन रखइया लाज।
बुधवार, 2 अक्टूबर 2024
तुम खेती मा लाभ का धन्धा बतामय आ गया।
य विपत के घरी मा तुमहूं भजामैं आ गया।
तलवार फरगत के जघा पायल मजामै आ गया। ।
अबहिंन एक किसान कै लहास उची ही
तुम खेती मा लाभ का धन्धा बतामय आ गया। ।
सोमवार, 30 सितंबर 2024
मइहर जिला शारद नगरी।
मैहर जिला
----------------------------------
मइहर जिला शारद नगरी।
जेखर कीरती जग बगरी।।
पहिलय पूजा करै नित आल्हा।
रोज चढ़ाबै फूल औ माला ।।
राम सखा जू का आश्रम पाबन।
ओइला गोलामठ पबरित मन।।
गोपाल बाग औ राम बाग मा।
पहुंचै वहै है जेखे भाग मा ।।
हनुमत कुंज भदन पुर बाले।
हें कैमोर पहार के खाले। ।
श्री सिद्ध बाबा मऊ डोंगरी ।।
मइहर जिला शारद नगरी।
श्रद्धा श्रम संगीत का संगम ।
किहन अगस्तव का स्वागत हम ।।
भै नहीं झुकेही केर समीक्षा।
जहां दिहिन अगस्त विंध्य का दीक्षा।।
बाणासुर का हिअय मनाउरा।
गाँव गाँव मा खेर का चउरा ।।
चउकी चटकउला चपना के।
हनुमत कष्ट हरैं अपना के।।
गाँव करसरा कालका काली।
दुर्गा मइया बछरा बाली ।।
जहाँ भक्ती कै कलश बनै गगरी।
मइहर जिला शारद नगरी। ।
खजुरी ताल का मंदिर भइया।
पोंड़ी धाम मा होय समइया ।।
मुकुंदपुर का इतिहास पुरातन।
जहाँ जगन्नाथ जू स्वयं सनातन।।
हुअय बना है शेर सफारी।
अपने बिंध कै बना चिन्हारी।।
पपरा मा श्री राम दूत हैं ।
रामनगर मा गिद्ध कूट हैं ।।
मार्कण्डेय कै आश्रमधानी।
बाणभट्ट का सुमिरै बानी।।
बाणसागर करै जहाँ पैपखरी।
मइहर जिला शारद नगरी।
हेमराज हंस भेड़ा
शनिवार, 21 सितंबर 2024
मदन मोहन मिश्र ---बनारस
शुक्रवार, 20 सितंबर 2024
पबरित परसाद भंडासराध कइ रहे हें।।
जे मंदिर कै हमरे खंडित मरजाद कइ रहे हें।
पबरित परसाद भंडासराध कइ रहे हें।।
उनहीं पकड़ के सीधे सूली मा टांग द्या
हमरे धरम के साथ जे अपराध कइ रहे हें।।
हेमराज हंस -भेड़ा मैहर
रविवार, 15 सितंबर 2024
KAVI SAMMELAN KARVI 14.09.2024
हिंदी दिवस पर पावन धाम चित्रकूट के पुरानी कोतवाली केसामने हुए कवि सम्मेलन में कवियों
ने हर रस की कविताएं सुनाकरलोगों का भरपूर मनोरंजन किया।इसका आयोजन योगेंद्र दत्त द्विवेदी
एजूकेशन सोसायटी, साहित्यसाधना ग्रुप एवं नगर पालिकापरिषद के संयुक्त तत्वावधान मेंकिया गया।
कार्यक्रम की शुरुआत आचार्यब्रजेंद्र शास्त्री ने दीप प्रज्ज्वलनसे की। अध्यक्षता शायर अख्तरफ़राज़ ने की। संचालन डा. मनोजद्विवेदी, हबीब खान व छतरपुर केकवि सूरज पंडित ने किया। सतनाकी कवयित्री दीपा गौतम ने बेटियों
पर रचना पढ़, नीरांजना के पुष्प
सी होती हैं बेटियां, कोमलहृदय
करुणा सी होती हैं बेटियां।
चरखारीके प्रदीप दिहुलिया ने व्यंग्य रचना,
चाहते हो जीवन को सफल बनाना
यदि, पत्नी की हां में हां मिलाते चले
जाइए, वह दिन को कहे जो रात,
दूध को कहे जो भात, सहमति में
शीश को हिलाते चले जाइए पढ़कर
वाहवाही बटोरी।
सूरज पंडित ने पढ़ा, खुशियों का संसार तुम्हारे नाम
किया, जीवन भर का प्यार तुम्हारे
नाम किया।
मैहर के कवि हेमराज हंस ने,
फलाने कै भईंस बहुत
पल्हात ही, लागत है मिड डे मील कै
दरिया खात ही, गभुआर चले गें पेट
खलाये सरकारी योजना ठाड़े बिदुरात ही।
पढ़कर व्यवस्थाओं पर करारी चोट
की।
दिनेश दीक्षित संघर्षी ने, हिंद
देश का मान हूं मैं तो हिंदी भाषा
ठहरी हूं, क्यों बेबस लाचार खड़ी
मैं जंजीरों में जकड़ी हूं, से भाषा की
व्यथा को व्यक्त किया।
श्रीनारायणतिवारी ने इंसानियत पर पंक्तियांपढ़ीं, जिनको प्यारे सभी इंसान नहींहोते हैं, वो तो हिंदू या मुसलमान
नहीं होते हैं। मेरे श्रीराम ही अल्ला भी तुम्हारे हैं, एक दुनिया में दोभगवान नहीं होते हैं। गज़लकारअख्तर फ़राज़ ने मंदाकिनी नदीकी अनदेखी पर व्यथा जताई, नदी
मंदाकिनी से वाकई ह पै ्यार तो दखे ो,हरी मोहन राय, संदीप श्रीवास्तवने भी रचनाएं पढ़ीं। समाजसेवीअभिमन्यु भाई ने मंदाकिनी कीअविरल धारा के लिए मार्मिक रचनासस्वर प्रस्तुत की। बांदा की रीनासिंह ने बेटियों और मां मंदाकिनीपर अपनी रचना पढ़कर भावविभोर
कर दिया। इस मौके पर सदर विधायक अनिल प्रधान, अधिवक्ता आलोक द्विवेदी, रामबाबू गुप्ता,रमेश चंद्र द्विवेदी, जगदीश गौतम, राजा करवरिया, ज्योति करवरिया, चित्रा द्विवेदी, सीमा शुक्ला, डा. एसपी त्रिपाठी, रामपाल त्रिपाठी,रामलाल द्विवेदी प्राणेश, राघव चित्रकूटी, राजेश जायसवाल, अर्चन द्विवेदी, आदि ने कवियों काउत्साहवर्धन किया।
.jpeg)
बुधवार, 11 सितंबर 2024
unchehara kavi sammelan
शानदार भा कवि सम्मलेन, गरिमा पूर्ण उचहरा मा।
शुक्रवार, 6 सितंबर 2024
दोहा खंड
सोमवार, 2 सितंबर 2024
रविवार, 18 अगस्त 2024
मंचीय मुक्तक
सिरि बानी बन्दना
*********************
हे मातु शारदे संबल दे तै निरबल छिनीमनंगा का।
मोरे देस कै शान बढै औ बाढै मान तिरंगा का॥
दिन दिन दूना होय देस मां लोकतंत्र मजबूत।
घर घर विदुषी बिटिया हों औ,लड़िका होंय सपूत॥
विद्वानन कै सभा सजै औ पतन होय हेन नंगा का।
मोरे देस कै शान बढै औ बाढै मान तिरंगा का॥
बसुधैव कुटुंम्बं' केर भामना बसी रहै सब के मन मां।
औ परबस्ती कै लउलितिया, रहै कामना जन जन मां ॥
देस प्रेम कै जोत जलै, कहूं मिलै ठउर न दंगा॥
मोरे देस.........................
खेलै पढै बढैं बिद्यार्थी, रोजी मिलै जमानन का।
रोटी औ सम्मान मिलै, हेन घर घर बूढ़ सयानन का॥
रामेश्वरं मां चढत रहै जल, गंगोतरी के गंगा का।
मोरे देस कै ......................
..............................
मैहर धाम
मइहर है जहां विद्या कै देवी, विराजी माँ शारद शक्ति भवानी।
पहिलय पूजा करय नित आल्हा,औ देवी के वर से बना वरदानी॥
मइहर है जहा लिलजी के तट , मठ मह शिव हें औधड.दानी॥
ओइला मां मन केर कोइला हो उज्जर,लंठव ज्ञानी बनै विज्ञानी।
मइहर है जहा संगम है , सुर सरगम कै झंकार सुहानी॥
अइसा पुनीत य मइहर धाम कै, शत शत वंदन चंदन पानी॥
**************************************
बिटिया
ठुम्मुक ठुम्मुक जाथी इस्कूलै ड्रेस पहिर के बइया रे।
टाँगे बस्ता पोथी पत्रा बिटिया बनी पढ़इया रे। ।
खेलै चन्दा, लगड़ी, गिप्पी, गोटी, पुत्ता -पुत्ती ।
छीन भर मा मनुहाय जाय औ छिन भर माही कुट्टी। ।
बिट्टी लल्ला का खिसबाबै ''लोल बटाइया रे''। ।
ठउर लगाबै अउजै परसै करै चार ठे त्वारा।
कहू चढ़ी बब्बा के कइयां कहु अम्मा के क्वारा। ।
जब रिसाय ता पापा दाकै पकड़ झोठइया रे।
बिन बिटिया के अंगना अनमन घर बे सुर कै बंसी।
बिटिया दुइ दुइ कुल कै होतीं मरजादा बड़मंसी। ।
हमरे टोरिअन काही खाये जा थै दइया रे।
भले नही भइ भये मा स्वाहर पै न माना अभारु।
लड़िका से ही ज्यादा बिटिया ममता भरी मयारू। ।
पढ़ी लिखी ता बन जई टोरिया खुदै सहय्याँ रे।
कन्यन कै होइ रही ही हत्या बिगड़ि रहा अनुपात।
यहै पतन जो रही 'हंस ' ता कइसा सजी बरात। ।
मुरही कोख से टेर लगाबै बचा ले मइया रे। ।
********************************************
शहीदन कै वंदना
-------------------
धन्न धन्न सौ बेर धन्न य देस कै पावन माटी।
हमरे पुरखन का प्रताप औ भारत कै परिपाटी। ।
कहय लाग भारत माता धन्न बहिनी डोर कलाई का।
जे सीमा मा संगीन लये दइन जीवन देस भलाई का। ।
धन्न कोख महतारी कै जे पूत दान दइन मूठी मा।
मातृभूमि के देस प्रेम का दूध पिआइन घूंटी मा। ।
धन्न धन्न वा छाती का जेहि एकव है संताप नही।
बलिदान पूत भा देस निता धन्न धन्न वा बाप कही। ।
धन्न धन्न वा येगुर काहीं वा सेंदुर कै मांग धन्न।
ज्याखर भा अहिवात अमर वा नारी केर सोहाग धन्न। ।
उई भाईन कै बांह धन्न मारिन सुबाहु मरीची अस।
बइरी वृत्तासुर मरै का जे बन गें वज्र दधीची अस। ।
औ अपने अपने रक्तन से वन्दे मातरम उरेह दइन.।
जब भारत माता मागिस ता उई हँसत निछावर देह दइन। ।
बोली हर हर महादेव कै बोल ऊचें सरहद्दी मा।
औ बैरिन का मार भगाइन खेलै खेल कबड्डी मा। ।
धन्न उई अमर जबानन का जेहिं कप्फन मिला तिरंगा का।
जब राख फूल पहुंची प्रयाग ता झूम उचा मन गंगा का। ।
ताल भैरवी देश राग तब गूंजी घाटी घाटी।
धन्न धन्न सौ बेर धन्न या देस कै पावन माटी। ।
==============================
आपन बोली
महतारी अस लगै मयारू घूंटी साथ पिआई।
आपन बोली बानी लागय मानस कै चौपाई।।
भांसा केर जबर है रकबा बहुत बड़ा संसार।
पै अपने बोली बानी कै अंतस तक ही मार।।
काने माही झनक परै जब बोली कै कबिताई।
आपन बोली बानी लागय मानस कै चौपाई।।
समझैं आपन बोली बानी बोकरी भंइसी गइया।
नीक लगै जब लोक गीत अस गाबै कहूं गबइया।।
अपने बोली मा कोल दहकी लोरी टिप्पा राई।
आपन बोली बानी लागय मानस कै चौपाई।।
महकै अपने बोली माही गांव गली कै माटी।
आपन बोली महतारी के हांथ कै परसी टाठी।।
अपने बोली मा गोहरामै घर मा बब्बा दाई।
आपन बोली बानी लागय मानस कै चौपाई।।
*************************************
टोरिया कहा है
बारजा बचा है ओरिआ कहाँ ही।
पिल्वांदा के दूध कै खोरिआ कहाँ ही।।
राशन कार्ड हलाबत तिजिया चली गै
कोटा बाली चीनी कै बोरिआ कहाँ ही।।
आजादी के अश्व मेध कै भभूत बची ही
गांधी के लोकतंत्र कै अजोरिआ कहाँ ही।।
वा प्रदूषण कै पनही पहिरे मुड़हर मा चला गा
घर गाँव के अदब कै ओसरिआ कहाँ ही।।
नोकरी लगबामैं का कहि के लइ गया तै
वा गरीब कै बड़मंसी टोरिआ कहाँ ही।।
सार अबाही खूंटा ग्यरमा औ अम्मा का पहिलय सुर
कामधेनु कै पामर वा कलोरिआ कहाँ ही।।
घर के सुख संच कै जे जपत रहें माला
वा पिता जी कै लाल लाल झोरिआ कहाँ ही।।
**********************************
************************************
मजूर [बघेली कविता ]
हम मजूर बनिहार बरेदी आह्यन लेबर लगुआ।
करी मशक्क़त तनमन से हम गरमी जाड़े कदुआ। ।
माघ पूस कै ठाही हो चह नव तपा कै दुपहरिया।
सामान भादौ के कादौ मा बे पनही बे छतरिया। ।
मिलब कहू हम पाथर फोरत करत कहू हरवाही।
खटत खेत खरिहान खान म काहू ताके पाही। ।
हम कहू का काम निकारी औ काहू के बंधुआ।
''कर्म प्रधान विश्व करी राखा ''कहि गें तुलसी दास।
कर्म देव के हम विश्कर्मा देस मा पाई त्रास। ।
शोषक चुसि रहे हे हमही अमर बेल की नाइ।
अउर चुहुकि के करै फराके गन्ना चीहुल घाई। ।
दुधिआ दातन मा बुढ़ाय गा हमरे गाँव का गगुआ।
हम पसीना से देस का सीच्यन हमरै किस्मत सूखी।
देस कोष मा भरयन लक्ष्मी घर कै लक्ष्मी भूखी। ।
घूंट घूँट अपमान पिअत हम गढ़ी प्रगति कै सीढ़ी।
मन तक गहन है बेउहर के हेन रिन मा चढ़ गयीं पीढ़ी। ।
फूंका परा है हमरे घर मा तउ हम गाई फगुआ। ।
हम मजूर ------------
हमिन बनायन लालकिला खजुराहो ताज महल।
हमिन बनायन दमदम पालम सुघर जिहाज महल। ।
हमहिंन बाँध्यन नदिया नरबा तलबा अउर तलइया।
हमिन बनायन धमनी चिमनी लखनऊ भूल भुलइया। ।
हम सिसकत सीत ओसरिया माहीं धइ के सोई तरुआ।
कहै क त गंगा जल अस है पबरित हमार पसीना।
तउ ''कर्मनाशा ''अस तन है पीरा पाले सीना।।
बड़े लगन से देश बनाई मेहनत करी आकूत।
मेहनत आय गीता रामायन हम हन तउ अछूत। ।
छुआछूत का हइया दाबे देस समाज का टेटुआ।
हम मजूर ---
बिन खाये के गंडाही का है छप्पन जेउनार।
कनबहिरे भोपाल औ दिल्ली को अब सुनै गोहर। ।
जब जब माग्यन उचित मजूरी तब तब निथरा खून।
पूंजी पति के पॉय तरी है देस का श्रम कानून। ।
न्याय मांगे मा काल्ह मारे गें दत्ता नियोगी रघुआ।
हम मजूर ---------------------------------
भले ठेस ठेठा कराह से हाँकी आपन अटाला।
पै हम करब न घात देस मा भ्रष्टाचार घोटाला। ।
जे खून पसीना अउंट के माड़ै रोटी केर पिसान।
हमी उराव है अइसन माई बाप कै हम संतान। ।
हमरे कुल मा पइदा नहि होंय डाकू गुंडा ठगुआ।
हम मजूर बनिहार बरेदी आह्यन लेबर लगुआ। ।
*******************************************
==============================
मोबाइल
सरासरीहन लबरी हिबै मोबाइल मा।
सुन्दर कानी कबरी हिबै मोबाइल मा। ।
क्याखर कासे प्यार की बातैं होती हैं
दबी मुदी औ तबरी हिबै मोबाइल मा। ।
विस्वामित्र मिसकॉल देख बिदुराय लगें
अहा ! मेनका परी हिबै मोबाइल मा। ।
नई सदी के हमूं पांच अपराधी हन
जाति गीध कै मरी हिबै मोबाइल मा। ।
कोउ हल्लो कहिस कि आँखी भींज गयीं
काहू कै खुश खबरी हिबै मोबाइल मा। ।
अब ता दण्डकवन से बातैं होती हैं
श्री राम कहिन कि शबरी हिबै मोबाइल मा। ।
''हँस ''बइठ हें भेंड़ा भिण्ड बताउथें
द्याखा कइसा मसखरी हिबै मोबाइल मा। ।
**********************************
***********************************
नेता जी
उइ कहा थें देस से गरीबी हम भगाय देब
गरीबी य देस कै लोगाई आय नेता जी।
गरीबी भगाय के का खुदै तू पेटागन मरिहा
वा तोहई पालै निता बाप माई आय नेता जी। ।
गरीबी के पेड़ का मँहगाई से तुम सींचे रहा
तोहरे निता कल्प वृक्ष नाइ आय नेता जी।
भाषन के कवीर से अस्वासन के अवीर से
वा तोहरे बोलिआय का भउजाई आय नेता जी । ।
===========================
**************************************
जब से आपन गाँव।
शहर मा जाके रहय लाग जब से आपन गाँव।
भरी दुपहरी आँधर होइगै लागड़ होइ गै छाँव। ।
गाँवन कै इतिहास बन गईं अब पनघट कै गगरी।
थरी कोनइता मूसर ज्यतबा औ कांडी कै बगरी। ।
गड़ा बरोठे किलबा सोचइ पारी आबै माव ।
हसिया सोचै अब कब काटब हम चारा का ज्यांटा।
सोधई दोहनिया मा नहि बाजै अब ता दूध का स्यांटा। ।
काकू डेरी माही पूंछै दूध दही का भाव।
दुर्घट भै बन बेर बिही औ जामुन पना अमावट।
''राजनीत औ अपराधी ''अस सगली हाट मिलावट। ।
हत्तियार के बेईमानी मा डगमग जीवन नाँव।
जब से पक्छिमहाई बइहर गाँव मा दीन्हिस खउहर।
उन्हा से ता बाप पूत तक करै फलाने जउहर। ।
नात परोसी हितुअन तक मां एकव नही लगाव।
कहै जेठानी देउरानी के देख देख के ठाठ ।
हम न करब गोबसहर गाँव मा तोहरे बइठै काठ। ।
हमू चलब अब रहब शहर मा करइ कुलाचन घाव।
नाती केर मोहगरी ''आजा'' जुगये आस कै बाती।
बीत रहीं गरमी कै छुट्टी आयें न लड़िका नाती। ।
खेर खूंट औ कुल देउतन का अब तक परा बधाव।
ममता के ओरिया से टपकैं अम्माँ केर तरइना।
फून किहिन न फिर के झाँकिन दादू बहू के धइना .। ।
यहै रंझ के बाढ़ मां हो थै लउलितियन का कटाव।
शहर मा जाके ----------------------------------------
********************************************
****************************************************
****************** चुगल खोर******************
हम करी चेरउरी चुगल खोर तुम सुखी रहा य देस मा।
तुम बइठे नक्कस काटा औ सब जन रहैं कलेष मा। ।
हे अकरमन्न हे कामचोर सब काँपैं तोहरे दांव से।
कड़ी मशक्कत के कर्ता तक भागै तोहरे नांव से। ।
तुमसे सब है कारबार जस धरा धरी है शेष मा।
हे चापलूस चउगिर्दा हेन तोहरै तोहार ता धाक हिबै।
तोहरेन चमचागीरी से हमरे नेतन कै नाक हिबै। ।
तुम कलजुग के देउता आहू अब माहिल के भेष मा।
हे !महा दोगला हे अकही !!अकहापन कै पूंजी तुम।
बड़ा मजा पउत्या है जब आने कै करा नमूजी तुम। ।
गद गद होय तोहार आतिमा जब कोउ परै कलेस मा।
तुम 'मनगवां के कुकूर कस ' चारिव कइती छुछुआत फिरा।
मुँह देखी मा म्याऊ म्याऊ औ पीठ पीछ गुर्रात फिरा। ।
सगले हार तोहार असर है देस हो य परदेस मा।
केत्तव होय मिठास चाह छिन भर मा माहुर घोर द्या।
तुम भाई हितुआ नात परोसी का आपुस मा फोर द्या। ।
तोहरे भीरुहाये मा पति -पत्नी तक चढ़ गें केस मा।
हे मंथरा के भाई तुम जय हो हे नारद के नाती।
नाइ दुआ करत बागा बे डाक टिकस कै तुम पाती। ।
हे राम राज के 'धोबी 'तुम घुन लाग्या अवध नरेश मा ।
हम करी चेराउरी चुगल खोर तुम सुखी रहा य देस मा। ।
हेमराज हंस -- भेड़ा मइहर
====================================
---- हम सरबरिया बाम्हन आह्यन
हम सरबरिया बाम्हन आह्यन मिलब साँझ के हाउली मा।
मरजादा का माजब धोऊब नरदा नाली बाउली मा। ।
होन मेल जोल भाई चारा कै साक्षात् हिबै तस्बीर।
नक्सल्बादी असम समिस्या औ नहि आय झंझट कश्मीर। ।
अगड़ा पिछड़ा आरछन का लफड़ा बाला नहि आय भेद।
जात -पात अउ छुआछूत के ऊंच -नींच के नहि आय खेद। ।
समता मिलै हँसत बोलत होन पैग भजिआ लपकाउरी मा। ।
एक नाव एक भाव मा बइठे मिलिहै राजा रंक औ फक्कड़।
बड़े -बड़े परदूसन प्रेमी मिलिहै सुलगाये धुँआ औ धक्कड़। ।
रक्शा बाले -नक्शा बाले शिक्षा स्वस्थ्य सुरक्षा बाले।
बने पुजारी सरस्वती के अद्धी पउआ बोतल घाले। ।
बड़े शान से भाषन झारत मद्ध निषेध के रैली मा। ।
भले दये अदहन चुलबा मा ताकै टोरबन कै महतारी।
औ हमार या अमल सोबाबै रात के लड़का बिना बिआरी। ।
हमही चाही रोज साँझ के मुर्ग मुसल्लम पउआ अद्धी।
शहर गॉव मा लूट मार कई देइ ढ़ील कनून कै बद्दी। ।
हम बिन सून ही राजनीत जस खरिहान कुरईली मा। ।
महुआ रानी पानी दय दय हमही बनै दिहिस लतखोर।
पहलमान अस अकड़ रहे हन भले हबै अंतस कमजोर।।
बीस बेमारी चढ़ी है तन मा तउ नही या छूटै ट्याव।
मदिरा तजा विक्ख की नाइ डिग्गी पीटा गांव -गांव। ।
नही पी जयी या समाज का बगाई कौरी कौरी मा।
चला करी प्रण आइस भाई कोउ जाय न हौली मा। ।
******************************************
-------------------------------------------
करा खूस
उंइ कहिन आज हमसे घर मां,अब तुमहूं त कुछ करा खूस।
देखत्या है उनही तिपैं ज्याठ, तुम हया जड़ाने मांघ पूस॥
अरे कहूं रोप एकठे बिरबा, आपन फोटो खिंचवा लेत्या।
औ पर्यावरणी प्रेमिन मां, अपनौ नाव लिखवा लेत्या॥
पुन रेंजर से कइ सांठ गांठ, ठेका लइ लेत्या जंगल का।
जब अपनौ टाल खदान चलत,परसाद चढत हर मंगल का॥
गलिहारव हेरत रहै छांह, औ गोरूआ हेरैं घास फूस।
अब तुमहूं...........................
विद्युत मंडल बालेन से , तुमहूं हितुआरथ कइ लेत्या।
पुन चलत ठ्यसर मोटर चक्की,लुग्गी से स्वारथ कर लेत्या॥
कुछ लइनमैन का दइ दीन्या,त व बिजुली अस गोल रही।
औ अपनेव बिजली चोरी कै,दबी मुदी सब पोल रही॥
जब अधिकारी दउरा करिहैं,त वहै बनी आपन जसूस।
अब तुमहूं......................
बन जात्या कोटेदार तुहूंकइ जोर तुगुत कउनौ ओठरी।
करत्या पुन कालाबाजारी तुम उचित मूल्य के बोर्ड तरी॥
तेल चिनी औ चाउर से, जब चकाचक्क आनंद रहत।
औ सहबौ का थक्की भेजत्या, ता उनहूं का मुंह बंद रहत॥
सब बनगें कोटेदारी से, का तोंहरेन दारी परा उूंस।
अब तुमहूं.......................
तुमहूं ता तन से हया उजर, मन भले हबै सांमरपानी।
अपनेन ख्वांपा से शुरू करा, उतिना पहिले अपनै छान्ही॥
सरमन'कै भगती छ्वाड़ा, सह पइहा न कमरी का भार।
भाईन का हीसा हड़प हड़प, होइ चला चली पहिले निनार॥
जरजात लिखा ल्या नामे मां पटवारी का लै दै के घूंस।
अब तुमहूं त कुछ करा खूस॥
गीता कुरान औ बाइबिल का, चल कउनौ चाल लड़ा देत्या।
देस भक्त के पोथी मां तुम अपनौं नाव चढा लेत्या॥
भाईचारा का बिख दइके, दुध पिअउत्या दंगन का।
पर्दा का पल्ला छाड़ा, है नओ जमाना नंगन का॥
तुष्टीकरण के पुस्टी माही, कौमी एकता का जलुस।
अब तुमहूं.......................
तोहरव बिचार घिनहे सांकर, औ कपट नीत मां दोहगर हा।
सिंघासन के पण्डन कस तुम भितरघात मा पोहगर हा॥
तुम दंदी फन्दी फउरेबी, औ चुगुलखोर के सांचा हा।
मुंह देखी भांषन गीत पढै मा, तुम चमचन के चाचा हा॥
चोर हया तुम कवियन अस, औ पत्रकार कस चापलूस।
अब तुमहूं त कुछ खूस, अब तुमहूं त कुछ खूस॥
-----------------------------
*****************************
=============================
भइलो चलें करामय जांच
**************
जब उंइ खाइन मिला न आरव। हर गंगे।
हमरे दारी झारव झारव ॥ हर गंगे।
कूटत रहें रोज उंइ लाटा। हर गंगे।
हमरे दारी लागैं डांटा ॥ हर गंगे।
पांच साल खुब किहिन तरक्की।हर गंगे।
बोर ठ्यसर औ लगिगै चक्की॥हर गंगे।
दिहिन न हमही ध्याला झंझी।हर गंगे।
अब हिसाब कै मांगै पंजी॥हर गंगे।
अब य ओसरी आय हमार।हर गंगे।
अब तुम सेंतै करत्या झार॥हर गंगे।
भयन संच मां जब हम पांच।हर गंगे।
भइलो चलें करामय जांच॥हर गंगे।
जादा तुम न करा कनून।हर गंगे।
चुहकैं द्या जनता का खूंन॥हर गंगे।
मुलुर मुलुर द्याखा चउआन।हर गंगे।
हम कूदी तुम ल्या बइठान॥हर गंगे।
होइगे भइलो सत्तर साल।हर गंगे।
हमूं बनाउब ढर्रा ताल॥हर गंगे।
जब आंगना मां होइगै नाच।हर गंगे।
त भइलो चलें करमय जांच॥हर गंगे।
*********************************
***************************************
----------------------------------------
हिन्दी
वीर कै गाँथा लगी जो रचैं औ 'जगनिक 'के आल्हा का गायगै हिन्दी।
कब्बौ बनी 'भूखन 'कै बानी त वीरन का पानी चढ़ाय गै हिन्दी। ।
हाथे परी 'सतसय्या 'के ता वा 'सागर मा गागर 'भराय गै हिन्दी।
बुढ़की लगाइस 'सूर 'के सागर ता ममता मया मा नहाय गै हिन्दी। ।
'रसखान 'के क्वामर क्वामर छन्द औ मीरा के पद काही ढार गै हिन्दी।
भक्ति के रंग मा लागी रंगै तब भाषा लोलार पिआर भै हिन्दी। ।
बीजक साखी कबीर के व्यंग्य पाखण्डिन का फटकार गै हिन्दी।
औ मासियानी मा तुलसी के आई ता 'मानस 'अगम दहार भै हिन्दी। ।
हिंठै लगी जब 'पंत 'के गाँव ता केत्ती लगै सुकुमार य हिन्दी।
हरिचंद ,महावीर ,हजारी ,के त्याग से पुष्ट बनी दिढ़वार य हिन्दी। ।
निराला ,नागार्जुन ,के लेखनी मा भै पीरा कै भ्याटकमार य हिन्दी।
रात जगी जब ''मुंशी ''के साथ ता हरिया का भै भिनसार य हिन्दी। ।
भारत माता के कण्ठ कै कण्ठी औ देस कै भाषा लोलार हिन्दी।
लोक कै बोली औ भाषा सकेल के लागै विंध्य पहार य हिन्दी। ।
छंद ,निबंध ,कहानी,औ कविता से लागै सुआसिन नार य हिन्दी।
अपने नबऊ रस औ गण शक्ति से कीन्हिस सोरहव सिगार य हिन्दी। ।
------------------------------------------------------
*************DOHA***************************
हमरे भारत देस मा कबिता बड़ी लोलार।
छत्रसाल राजा बने कबिता केर कहार।।
किहिस सनातन सब दिना, जन मंगल का गान।
प्राणी मा सद भावना, बिस्व केर कल्यान।।
राघव मरजादा दिहिन, औ माधव जी कर्म।
दुइ लीखन मा चलि रहा,सत्य सनातन धर्म।।
उनही सौ सौ नमन जे कीन्हिन जीबन हूम।
बंदे मातरं बोल के गें फाँसी मा झूम।।
------- ------------
जिनखे माथे पूर भा आजादी का जग्ग।
हम भारत बासी हयन उनखर रिनी कृतग्ग।।
बिटिआ बेदन कै ऋचा साच्छात इस्लोक।
दुइ कुल का पामन करइ अउ साथै मा कोंख।।
रहिमन पनही राखिये,बिन पनही सब सून।
दिल्ली से है गांव तक, पनही का कानून॥
गोबर से कंडा बनै, औ गोबरै सेे गउर।
आपन आपन मान है,अपने अपने ठउर॥
**पर्यावरण के दोहा **************
परयाबरनी प्रेम कै देखी भारतीय खोज।
अमरा के छहियां करी अपना पंचे भोज।।
----- --------------
पीपर मा बसदेव जू बधी बरा के सूत।
तुलसी जू कै आरती आमा मानैं पूत।।
------------------
नीम बिराजैं सीतला औ जल बरुन का बास।
परयाबरन मा पुस्ट है भारत का बिस्वास।।
--------------------
हमरे भारत का रहै चह कउनौ तेउहार।
सब दिन हम पूजत रह्यन बिरबा नदी पहार। ।
--------------------------
दादू के सुख संच मा जे मानय आनंद।
अम्मा अस कउनौ नहीं दुनिआ का संबंध।।
***************************
अम्मा अपने आप मा सबसे पाबन ग्रंथ।
माता से बढि के नही कउनौ ज्ञानी पंथ।।
========================
हा हजूर हम गॉव के शुद्ध देहाती ठेठ।
अपना अस काटी नहीं हम गरीब का पेट। ।
बब्बा जी कीन्हिन रहा खसरा केर अपील।
नाती तक पेसी चली बिदुराथी तहसील।।
बड़े अदब से बोलिये, उनखर जय जय कार।
गांव- गांव मा चल रही , गुंडन कै सरकार।।
********************************
चह जेही थुर देंय उइ ,याकी कहैं कुलांच।
नेता जी के नाव से, अयी न कऊनव आंच। ।
*****************************
जेही सब मानत रहें जादा निकहा सूध।
ओखे डब्बा म मिला सबसे पनछर दूध।।
साहब सलाम औ पैलगी, गूंजै राम जोहर।
अबहूँ अपने गाँव मा, बचा हबै बेउहार। ।
*************************
देस मा भ्रस्टाचार का, ह्वाथै यतर निदान।
जइसा जींस पहिर के काटै फसल किसान।।
बीस जघा कर्जा किहिस, तब होइ सका प्रबंध।
अपना का आबा नहीं, नेउता मा आनंद।।
खेत बिका कोलिया गहन बिकिगा झुमका टाप।
पट्टीदार बिदुराथें सिसकै बिटिअय बाप।।
****** ************
ओतुन परबस्ती करा , जेतू कूबत पास।
परोपकार मा चला गा ,भोले का कैलास।।
==========================
पहिले प्रेम प्रसंग का ,खूब भा लोकाचार।
फेर ओही लुच्ची कहिस ,वा ओहि दहिजार।।
पुष्पवाटिकै मा मिली, सहज प्रीत का नेम।
सुरपंखा हेरत फिरय, पंचबटी मा प्रेम।।
कहिस कुलांचै धरम का, दिहिस आतिमा रोय।
जइसा कउनव बाप कै, बिटिआ भागी होय।।
लेत रहें जे थान के, लम्बाई कै नाप।
अर्ज देख लोटय लगा,उनखे छाती सांप।।
===========================
सुनतै जेखे नाव का, जांय मुगलिया कांप।
भारत के वा बीर हैं, महराणा परताप।।
भ्रस्टाचार मा डूब गा, जब मगधी दरबार।
धनानन्द सैलून मा, लगें बनामय बार।।
कहिन फलाने हम हयन, पढ़े लिखे भर पूर।
पै अब तक आई नहीं, बोलय केर सहूर।।
भारत पूजिस सब दिना,रिसी कृसी के साथ।
एक हाथे मा शास्त्र का, शस्त्र का दूजे हाथ।।
======================
दुनिया मा सब दिन लड़ें, धरम औ रीत रिबाज।
शाकाहारी सुआ के, बीच रहै न बाज।।
हमी न नजरा तुम यतर दरबारी सरदार ।
दुइ कउड़ी के हयन पै मन के मालगुजार। ।
किहिन मजुरै देस का ,सबसे ज्यादा काम।
तउअव जस मानै नहीं ,मालिक नामक हराम।।
दहसत माही कलम ही, कागद करै रिपोट।
राजनीत कब तक करी, गुंडन केर सपोट। ।
नेता जी के नाव से , उभरै चित्र सुभाष।
अब के नेता लागि रहें, जइसा नहा मा फास।।
गांव गांव मदिरा बिकै , दबा शहर के पार।
कउने सब्दन मा करी अपना का आभार। ।
सुनिस घोसना कापि गा, थर थर बपुरा पेण्ट।
खीसा का बीमा करी , जेब कतरा एजेण्ट।।
-
बघेली लोक साहित्य जब से मूड़े मा कउआ बइठ है। अशगुन लये बऊआ बइठ है। । इंदिरा आवास कै क़िस्त मिली ही वा खीसा मा डारे पउआ बइठ ... -
पहिले जब खड़े होकर लघु शंका करना निषिद्ध माना जाता था। तब की बात है।एक बालक खड़े होकर लघुशंका कर रहा था। गांव के एक बुजुर्ग ने देखा तो उसे...
-
BAGHELI SAHITYA बघेली साहित्य : bagheli kavita नाती केर मोहगरी ''आजा'' जुगये आस कै... : बघेली कविता www.baghelisahitya.co...
-
बघेली लोक साहित्य जब से मूड़े मा कउआ बइठ है। अशगुन लये बऊआ बइठ है। । इंदिरा आवास कै क़िस्त मिली ही वा खीसा मा डारे पउआ बइठ ...
-
बघेली लोक साहित्य -------------------------- पहिले भइलो अईना देखा। धौं पुन आपन धइना देखा। । चश्मा केर पोंछि के धूधुर जनत...